Нойроо сайн авахад туслах 10 зөвлөгөө

Нойроо бүтэн авах нь бие болон сэтгэцийн эрүүл мэндэд ямар чухал гэдгийг бид бүгд мэдэх боловч, тэр болгон нойроо сайн авч чаддаггүй билээ.
Нойрны асуудал аль ч насны хүмүүст сөргөөр нөлөө үзүүлж байдаг тул бид бүгд нойроо хангалттай авах тал дээр анхаарлаа хандуулахгүй бол болохгүй. Тэгвэл хэрхэн нойроо сайн авах 10 зөвлөгөөг хүргэж байна.
- Орны иж бүрэн хэрэгсэл болон орны матрасаа шинэчлэх
Таны хэрэгцээ, сонголтод тохирсон сайн матрастай байх нь таны амрах болон тав тухтай байдлыг хангахад тань чухал юм. Нэмэлт гудас, дэр ашиглах нь таны нурууг хөшиж өвдөхөөс сэргийлэхэд тус болохоос гадна таныг тааламжтай болон ая тухтай байдлыг хангахад бас нэгэн чухал үүрэг гүйцэтгэдэг юм. Шөнийн цагаар биеийнхээ тохиромжтой температурыг бүрдүүлэхийн тулд танд тохирсон ор дэрний цагаан хэрэглэл ашиглахыг зөвлөж байна.
- Гэрлээс аль болох зайлсхийх
Хэт их гэрэлд байх нь таны нойр болон өдрийн хэмнэлийг алдагдуулдаг. Цонхныхоо урдуур хар бараан өнгийн хөшиг тохох эсвэл нүдэндээ зүүдэг нойрны маск ашиглан гэрлийг хааснаар таны сайн амарч нойроо авахад туслана. Мөн хамгийн чухал нь унтахаасаа өмнөх хэсэг хугацаанд гэрлээ багасган, нойр хүргэдэг даавар болох мелатонин бодисыг ялгаруулах нь хамгийн зөв зүйтэй арга юм.
- Дуу чимээг багасгах
Дуу чимээ багатай орчин үүсгэх нь нойроо алдагдуулахгүй бас нэгэн чухал хэсэг юм. Хэрэв та ойролцоох дуу чимээгээ багасгах боломжгүй бол чихний бөглөө эсвэл чихэвч нь таныг дуу чимээгүй, анир орчинд унтахад тань туслах болно.
- Дор хаяж долоон цаг унтах
Хэрэв та шөнө бүр авах ёстой нойроо авахыг хүсэж байвал цагийн хуваарь үүсгэх хэрэгтэй. Тогтсон сэрэх цагаа харгалзан үзэж, дараагаар нь хэдэн цагт унтахад хамгийн багадаа 7 цагийн нойр авах талаар тооцоолоорой. Боломжтой бол унтахаасаа өмнөх хэсэг хугацааг нойрсохдоо бэлтгэх үе болгох нь тохиромжтой.
- Сэрүүлгээ өдөр бүр ижил цагт тохируулах
Хэрэв та өөр өөр цагт байнга сэрдэг бол таны бие эрүүл унтах дадалд дасах нь бараг боломжгүй юм. Тогтмол сэрэх цагаа сонгон тодорхойлоод түүнийгээ амралтийн өдөр болон бусад өдрүүдэд байнга хэрэгжүүлэх нь танд тустай.
- Өдрийн цагаар 20 минут орчим нойрсох
Шөнийн цагаар илүү сайн нойроо авахын тулд зүүрмэглэх тал дээрээ анхаарах зайлшгүй шаардлагатай болдог. Хэрэв та өдрийн цагт хэтэрхий урт хугацаагаар зүүрмэглэдэг бол таны тогтмол хуваарийг алдагдуулж, хүссэн цагтаа унтахад бэрхшээл үүсгэдэг. Зүүрмэглэх хамгийн тохиромжтой цаг бол үдийн хоолны дараахан байх ба 20 минутын хугацаагаар амрах нь зүйтэй.
- Оройн хоолыг унтахын өмнөх хэдэн цагийн өмнө идэх
Хэрэв та оройн хоолоо унтахын өмнөхөн идсэн бол унтахад ходоод тань тэрхүү хоолыг шингээх үйл ажиллагаа явуулах тул нойр хүрэхгүй байх тал бий. Үүнээс сэргийлэхийн тулд оройн хоолыг оройтуулж идэхээс зайлсхийх. Мөн оройн хоолондоо өөх тос, халуун ногоотой хоолыг багасгахыг хичээ. Хэрэв танд оройн зууш хэрэгтэй бол хөнгөхөн зүйлийг сонгоорой.
- Унтахаасаа өмнө төхөөрөмжүүдээ унтраах
Таблет, гар утас, зөөврийн компьютер гэх мэт электрон хэрэгсэл унтахаасаа өмнө ашиглах нь тун буруу үйлдэл юм. Учир нь электрон хэрэгслээс ялгардаг гэрэл нь мелатонин дааврийн ялгаруулалтыг сааруулдаг. Тиймээс тухайн хэрэгслүүдийг унтахаас цагийн өмнө унтраах нь тустай.
- Өдөр бүр ядаж 20 минут дасгал хөдөлгөөн хийх
Өдөр тутмын дасгал хөдөлгөөн ганц нойронд ч гэлтгүй эрүүл мэндэд сайн байдаг. Дасгал тогтмол хийснээр энергиэ болон биеийн температураа тэнцвэржүүлэн бат бөх унтахад чухал нөлөө үзүүлдэг. Ихэнх мэргэжилтнүүд унтахынхаа өмнө эрчимтэй дасгал хийхгүй байхыг зөвлөдөг, учир нь таны бие хэт ажиллагаанд орж нойр хүрэхгүй байх талтай.
Эх сурвалж: Sleep Foundation
Бэлтгэсэн: Сарасвати
Сэтгэгдэл үлдээх