Ерөнхий сайд Л.Оюун-Эрдэнэ “Говь” компанийн Берлин дэх салбар дэлгүүрийн үйл ажиллагаатай танилцлаа

Үндэсний ууган үйлдвэр “Говь”ХК нь Берлин дэх салбар дэлгүүрээ 2016 онд нээж, 2019 оноос олон улс дахь онлайн худалдаагаа эхлүүлэн сүүлийн гурван жилийн хугацаанд Европын Холбооны улсуудад болон дэлхийн хэрэглэгчдэд ноолууран бүтээгдэхүүнээ хүргэж буй ажээ. ХБНГУ-д албан ёсны айлчлал хийж буй Монгол Улсын Ерөнхий сайд Л.Оюун-Эрдэнэ “Говь”компанийн Берлин дэх салбар дэлгүүрийн үйл ажиллагаатай танилцлаа.
“Говь”ХК нь 2023, 2024 онд Европын Холбооны 27 орон болон Их Британи зэрэг улсад нийт 60 салбарнээж, 2030 он гэхэд ажилчдынхаа тоог 8500-аар нэмэгдүүлж 10 мянгад хүргэх, бүтээгдэхүүнээ олон улсын зах зээлд худалдаалан бизнесээ өргөжүүлэн, улсынхаа экспортын хэмжээг нэмэгдүүлж, монгол ноолуурыг дэлхийд таниулахаар ажиллаж байна гэж “Таван богд” группийн ерөнхий захирал Ц.Баатарсайхан Ерөнхий сайдад танилцууллаа. Мөн 100 мянган малчин өрхөөс ноолуур бэлтгэж эцсийн бүтээгдэхүүн үйлдвэрлэн борлуулж, манай улсын ноолуураас олдог хоёр их наядын орлогыг зургаа болгож нэмэгдүүлэх зорилготой гэж ярилаа.

Уул уурхай давамгайлсан эдийн засгийг солонгоруулж, нэмүү өртөг шингэсэн бүтээгдэхүүн үйлдвэрлэн дэлхийн зах зээлд нийлүүлж буй “Говь” компанийн хамт олонд Ерөнхий сайд талархал илэрхийлээд дэлхийд гарах том зорилгод нь амжилт хүслээ.
“Манай улсын экспортын бүтээгдэхүүний 90 гаруй нь уул уурхайнх. Уул уурхайн бүтээгдэхүүний үнэ дэлхийн зах зээлд унавал Монгол Улсын эдийн засаг хямардаг. Тиймээс Засгийн газар эдийн засгаа төрөлжүүлэн хөгжүүлэхийг нэн тэргүүний зорилтоо болгосон. Эдийн засгаа төрөлжүүлэх боломж манайд бий. Нэг нь, хөдөө аж ахуйн бүтээгдэхүүн буюу ноос ноолуур, арьс ширэн бүтээгдэхүүн. Нөгөө нь соёлын бүтээгдэхүүн үйлдвэрлэл, аялал жуулчлал”гэж Ерөнхий сайд яриад 2023 оныг Монголд зочлох жилээр зарлаж, Ерөнхий сайд өөрөө Үндэсний хороог ахлах шийдвэр гаргасан. Бид энэ хоёр салбарыг босгож ирэх зайлшгүй шаардлагатай. Нэмүү өртөг шингэсэн бүтээгдэхүүн экспортолж буй компаниудыг Засгийн газар дэмжиж ажиллахаа илэрхийллээ. Мөн Монголын брэнд бүтээгдэхүүнүүдийг дэлхийн зах зээлд гаргахын төлөө хамтдаа хичээх ёстой гэж хэллээ. Баялаг бүтээж, монгол ноолуурыг Европт дэлгэрүүлж байгаа "Говь" компанийн нийт хамт олонд Засгийн газрын тэргүүн талархал илэрхийлэв.