Сэрэмжлүүлэг: Нүхэн жорлонд унасан иргэдийг эсэн мэнд гаргаж, эмнэлэгт хүлээлгэн өгчээ

Иргэд болгоомж алдан нүхэн жорлонд унах тохиолдол гарсаар байна. Энэ сарын 31-ны өдөр л гэхэд ОБЕГ нүхэн жорлонд хүн унасан гэх хоёр дуудлага хүлээн авчээ.

Тодруулбал, Нийслэлийн Баянзүрх дүүргийн тавдугаар хороо, авто засварын газар жорлонд хүн унасан байна гэсэн дуудлагыг 2021.07.31-ны өдрийн 14:38 цагт Онцгой байдлын газар хүлээн авч, Нийслэлийн аврах ангийн алба хаагчид 9 километр замыг туулан 14:52 цагт очиж, 75 настай, эрэгтэйг 2.5 метрийн гүнтэй жорлонд унасан байсныг гаргаж, эмнэлгийн анхан шатны тусламж үзүүлэн нийслэлийн ЯТТТ-д хүлээлгэн өгсөн байна.

Мөн Хөвсгөл аймгийн Мөрөн сумын Эрхэл багийн тавдугаар гудамжинд бага насны хүүхэд жорлонд унасан тухай дуудлагыг мөн 2021.07.31 20:49 цагт хүлээн авч, Аймгийн Онцгой байдлын газрын алба хаагчид 20:58 цагт очиж, 4 метрийн гүнтэй жорлонд 6 настай, эмэгтэй хүүхэд унасан байсныг эсэн мэнд гаргаж, аймгийн Нэгдсэн эмнэлэгт хүлээлгэн өгчээ.

Иймд эцэг, эхчүүд хүүхдэдээ тавих хараа хяналтаа сайжруулж, болзошгүй эрсдлээс хамгаалах, нүхэн жорлонд орохдоо анхаарал болгоомжтой байхыг АНХААРУУЛЖ байна!