Чөлөөт бөхийн шигшээ багийнхан Йорданыг зорилоо

Чөлөөт болон сонгомол бөхийн насанд хүрэгчдийн Азийн аварга шалгаруулах тэмцээн Йорданы нийслэл Амман хотод  өнөөдөр эхэлж байна.

Сонгомол барилдаанаар эхэлж буй энэхүү тэмцээнд манай улсаас эрэгтэй, эмэгтэй тус бүр 10 болон сонгомлын гурван жинд нийт 23 тамирчин өрсөлдөхөөр мэдүүлэг өгсөн. Сонгомол бөхийн төрөлд дасгалжуулагч С.Мөнхсүхийн удирдлагад 55 кг-д М.Сумъяабазар, 63 кг-д Н.Ганбаяр, 77 кг-д Н.Оргил нар өрсөлдөхөөр Йорданд очжээ. Тэгвэл чөлөөт бөхийн шигшээ багийнхан өнөөдөр өглөө Йорданы зүг хүлгийн жолоо заллаа. Энэ удаагийн тэмцээнд Азийн 38 орны 370 гаруй тамирчин өрсөлдөхөөр мэдүүлэг өгсөн байна.

Манай багийн бүрэлдэхүүнийг дахин танилцуулбал, эрэгтэйчүүдийн 57 кг-д Б.Мөнх-Эрдэнэ, 61 кг-д Т.Түвшинтулга, 65 кг-д Ц.Цогбадрах, 70 кг-д Т.Тулга, 74 кг-д Б.Батбаяр, 79 кг-д О.Сүлдхүү, 86 кг-д Н.Батбилгүүн, 92 кг-д Б.Бат-Эрдэнэ, 97 кг-д Г.Ганхуяг, 125 кг-д М.Лхагвагэрэл нар барилдана. Тэгвэл эмэгтэйчүүдийн 50 кг-д Б.Мөнхнар, 53 кг-д Ч.Отгонтуяа, 55 кг-д Б.Отгонтуяа, 57 кг-д Х.Болортуяа, 59 кг-д Т.Алтжин, 62 кг-д С.Цэрэнчимэд, 65 кг-д Т.Энхжин, 68 кг-д Э.Дэлгэрмаа, 72 кг-д З.Болортунгалаг, 76 кг-д Э.Даваанасан нар зодоглох аж.

Чөлөөт бөхийн энэ оны УАШТ-нд түрүүлсэн тамирчин тивийн дэвжээнд хүч үзэх ба тус тэмцээн 1979 оноос эхлэлтэй. Тэгвэл монголчууд чөлөөт бөхийн Азийн АШТ-ээс анхлан медаль хүртсэн нь 1989 он юм. Япон улсад болсон тус тэмцээнээс 48 кг-ын жинд Ч.Батбадрал, 68 кг-д Х.Амараа, 82 кг-д П.Сүхбат нар алтан медаль хүртсэн бол 130 кг-д А.Баатархүү мөнгө, 74 кг-д Л.Энхбаяр, 90 кг-д Ч.Бямбадорж нар хүрэл медальтай ирж байв.

Монголын чөлөөт бөхийн баг 1979 оноос энэ тэмцээнд тасралтгүй оролцохдоо 1999 оноос бусад жилд медальтай ирсэн билээ.