Ч.Наранбаатар: Н.Түвшинбаяр дарга тамгаа авч ирж өгөөд, ажлаа албан ёсоор хүлээлгэн өгнө гэж найдаж байна

Ч.Наранбаатар: Н.Түвшинбаяр дарга тамгаа авч ирж өгөөд, ажлаа албан ёсоор хүлээлгэн өгнө гэж найдаж байна

Олимпын аварга Н.Түвшинбаяр өөрийн хүсэлтээр МҮОХ-ны Ерөнхийлөгчийн албан тушаалаа хүлээлгэн өгөхөөр болсон, ажилдаа эргэн орлоо гэх мэт зөрүүтэй мэдээллүүд хэвлэл мэдээллий хэрэгслүүдээр цацагдаж байгаа билээ. Тэгвэл тус мэдээллүүдийн талаар МҮОХ-ны Дэд ерөнхийлөгч Ч.Наранбаатар ийн тайлбар өгсөн юм.

Тэрээр “Олон улсын олимпын хорооноос “Танай олимпын хорооны Ерөнхийлөгч гэмт хэрэг үйлдсэн байна. Танай байгууллага ямар ёс зүйн хариуцлага тооцсон бэ” гэх утга бүхий албан бичгийг бидэнд удаа дараа ирүүлсэн. Улмаар МҮОХ-ны гүйцэтгэх зөвлөл хуралдаж, Ерөнхийлөгч Н.Түвшинбаярыг ажлаас нь түдгэлзүүлэх шийдвэр гаргасан. 

Тавдугаар сарын 27-нд Н.Түвшинбаяр дарга ажил дээрээ ирсэн. Ингэхдээ Олон улсын олимпын хороо руу “Ажлаа хийх хүсэлтэй байна” гэх захидлыг илгээсэн байна лээ. Олон Улсын олимпын хорооноос ёс зүйн хариуцлага тооц гэж хэлсний дагуу манай хорооны гүйцэтгэх зөвлөл хуралдаж, ажлаас нь түдгэлзүүлэхээр болсон. Гэтэл хурал болж байх үеэр МҮОХ-ны тамга, тэмдгийг авч явсан байна. Тамгаа авчирж өгөөд, ажлаа албан ёсоор хүлээлгэн өгнө гэж найдаж байна. Хэрэв энэ маргаан удаан үргэлжилбэл манай улсын тамирчид өөрийн улсын далбааг мандуулж чадахгүй, цагаан тугтай олимпод оролцох эрсдэл үүсэж болзошгүй” гэлээ.  

Эргэн сануулахад, МҮОХ-ны ерөнхийлөгч Н.Түвшинбаярыг бусдын эрүүл мэндэд хүнд хохирол учруулсан үндэслэлээр дөрөвдүгээр сарын 3-ны өдөр Хан-Уул дүүргийн Цагдаагийн I хэлтэст шалгаж, мэдүүлэг авсан бөгөөд Н.Түвшинбаярыг “Хүний биед санаатайгаар хүнд гэмтэл учруулсан” гэмт хэрэгт яллагдагчаар татан, цагдан хорьж шалгаж байсан юм. Улмаар тавдугаар сарын 20-ноос түүнийг суллаж, холбогдох эрүүгийн хэргийг шийдвэрлэж дуустал Монгол Улсын хилээр гарахыг хязгаарлах таслан сэргийлэх арга хэмжээ авч шийдвэрлэсэн.  

Харин түүнд зодуулсан Э.Энхбатын хувьд өчигдөр ухаан орсон ч одоогоор  ярьж, хөл гараа хөдөлгөж чадахгүй байгаа талаар эх сурвалжууд мэдээлж байгаа юм.


Зөвлөмж!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд niitlel.mn хариуцлага хүлээхгүй.

Сэтгэгдэл үлдээх

Таны мэйл хаягаар сэтгэгдэл бичигдэнэ.