Богдхан уулын дархан цаазат газрын газар ашиглалтын өнөөгийн байдал, цаашид авах арга хэмжээ сэдэвт хэлэлцүүлэг боллоо

Байгаль орчин, аялал жуулчлалын яамны санаачилгаар Богдхан уулын дархан цаазат газрын газар ашиглалтын өнөөгийн байдал, холбогдох маргаатай асуудлууд, цаашид авах арга хэмжээ сэдвийн хүрээнд газрын харилцаанд хамаарах төрийн байгууллагуудын холбогдох албан тушаалтан, албан хаагч, иргэдийн төлөөллийг оролцуулсан хэлэлцүүлэг явууллаа.

Хэлэлцүүлэгт Байгаль орчин, аялал жуулчлалын сайд Б.Бат-Эрдэнэ, БОАЖЯ-ны Тусгай хамгаалалттай бүс нутгийн удирдлагын газрын дарга Д.Батмөнх, Хуулийн хэлтсийн дарга С.Цогтгэрэл, Богдхан уулын дархан цаазат газрын хамгаалалтын захиргааны дарга Н.Бямбадорж, Улсын бүртгэлийн ерөнхий газар, БЗД-ийн газрын албаны мэргэжилтэн болон бусад албаны төлөөлөл оролцсон. Энэ удаагийн хэлэлцүүлгийн гол зорилго нь Богдхан уулын дархан цаазат газрын газар ашиглалтын өнөөгийн нөхцөл байдал, түүнийг тойрсон маргаантай асуудалд холбогдох төрийн шат шатны байгууллагууд, иргэдийн тал бүрийн оролцоотойгоор асуудлаа хэлэлцэж, цаашид авах арга хэмжээнд талуудын санал, дүгнэлтийг тусгахад чиглэсэн билээ.

Хэлэлцүүлгийн эхэнд, БОАЖЯ-ны харьяа Богдхан уулын дархан цаазат газрын хамгаалалтын захиргаанаас газар ашиглалтын өнөөгийн байдал, үүсээд буй газрын маргаантай асуудлууд, хилийн цэсийн маргаан, газрын төлбөр, татварын харилцаа, холбогдох хууль эрх зүйн орчин зэрэг сэдвээр иргэд олон нийтийн сонирхсон асуултад нээлттэй хариулт өгч, цаашид авах арга хэмжээний тухай оролцогч талууд хэлэлцлээ. Өдрийн 14 цагт эхэлсэн хэлэлцүүлэг хоёр цаг гаруй хугацаанд үргэлжилж, иргэдийн зүгээс тавьсан тодорхой хэд хэдэн асуудлуудад шийдэл гаргаж ажиллахаар боллоо.

Ингэхдээ, нэн тэргүүнд хууль эрх зүйн хүрээнд үүсээд буй ойлгомжгүй байдал, УИХ-ын тогтоол, хилийн цэсийн маргаанаас болж хохирч байгаа иргэдийн асуудлыг авч хэлэлцэхээр болов. Богдхан уулын дархан цаазат газрын газар ашиглалт, олголт, газрын төлбөр, гэрчилгээ, сунгалт түүнийг дагасан маргаан, хуулийн зөрчил зэрэг асуудлын ард олон иргэний эрх ашиг хөндөгдөж, зөрчигдөж байгаа учир газрын харилцаанд хамаарагдах төрийн шат шатын байгууллагуудын хамтын ажиллагаа, ойлголцол, хуулийн зохицуулалт зэргийг нэг талд гаргах, цаашид ийм байдлыг газар авхуулахгүйн тулд авах арга хэмжээ, гарц, шийдэл эрэлхийлэх зорилгоор зохион байгууллаа.