Хүрээлэн буй орчныг хамгаалах асуудлаарх Монгол-Оросын хамтарсан комиссын 10 дугаар хуралдаан боллоо

Хүрээлэн буй орчныг хамгаалах салбарт хамтран ажиллах тухай Монгол Улсын Засгийн газар, ОХУ-ын Засгийн газар хоорондын 1994 оны 2 дугаар сарын 15-ны өдрийн хэлэлцээрээр байгуулагдсан Хамтарсан комиссын 10 дугаар хуралдааныг 2022 оны 11 дүгээр сарын 03-ны өдөр цахим хэлбэрээр зохион байгуулав.

Хуралдаанд Монголын талаас Байгаль орчин, аялал жуулчлалын яамны Төрийн нарийн бичгийн дарга, Монгол-Оросын хамтарсан комиссын Монголын хэсгийн дарга Э.Баттулга тэргүүтэй төлөөлөгчид, Оросын талаас Оросын Холбооны улсын Байгалийн нөөц ашиглалтын хяналтын Холбооны албаны даргын зөвлөх, Орос-Монголын хамтарсан комиссын Оросын хэсгийн дарга А.М.Амирханов тэргүүтэй төлөөлөгчид тус тус оролцов.

Хамтарсан комиссын хуралдаанаар Хүрээлэн буй орчныг хамгаалах асуудлаарх Монгол, Оросын хамтарсан комиссын 9 дүгээр хуралдааны шийдвэрийн хэрэгжилт, ховордож байгаа болон устаж үгүй болох аюулд өртөөд буй амьтдын хил дамнасан бүлэглэл, популяцыг хамгаалах хамтын ажиллагаа, “Тэрбум мод” үндэсний хөдөлгөөнийг хэрэгжүүлэхэд хамтран ажиллах талаар хэлэлцэв.