Говь-Алтай аймгийн төгрөг суманд "100 булаг, 1000 малчин 15000 бөхөн" шинэ төслийн танилцуулах уулзалт болж байна

Говь-Алтай аймгийн тухайд булаг шандын эхийг хашиж хамгаалах ажлыг 2004 оноос модон шон өргөстэй тороор эхлүүлэн одоог хүртэл тасралтгүй зохион байгуулан 203 булаг шандын эхийг хашиж хамгаалсан байдаг. 2018 оноос эко клубын хүүхдүүдийн санаачилгыг Дэлхийн байгаль хамгаалах сан дэмжиж Бөхөн бүхий Халиун, Төгрөг, Шарга, Баян-Уул, Дарив, Тонхил, Хөхморьт сумуудад нэн ховор, ховор амьтдын усан хангамжийг сайжруулах зорилгоор булаг шандын эхийг хашиж хамгаалах ажлыг эхлүүлж 26 булаг хамгаалсан бол орон нутгийн төсөв буюу Байгаль хамгаалах нөхөн сэргээх арга хэмжээний зардлаар 7 булаг нийт 33 булаг хамгаалагдаж 328,798.8 сая.төгрөг үүнээс төсөл хөтөлбөрийн санхүүжилт 300,568.3, БНХСАХЗ 19,680.5, малчин иргэдийн хандив 8550.0 сая.төг зарцуулагджээ.

Булгийн эхийг хашиж хамгаалаад орхилгүйгээр мониторинг судалгаа хийж булаг хамгаалсан үр дүнг үнэлэн, олон нийтэд сурталчлан, эзэнжүүлэн сум, малчин, эко клуб гэсэн гурвалсан гэрээ байгуулж, булгийн өдрийг жил бүрийн 5,10 дугаар сарын 22 өдөр тэмдэглэн булгийн орчныг цэвэрлэж, хашаа хамгаалалтыг засаж сэлбэх өдөр болгон тэмдэглэсэн үр дүн, цаашид анхаарах асуудал болон булаг хамгаалснаар сүүлийн 5 жилийн хугацаанд хүрээлэн буй орчинд гарч буй эерэг үр дүнг хэлэлцэж, хамгаалсан булгийн үр дүнг харуулсан зургийн үзэсгэлэн гаргаж, 2023 оноос хэрэгжих "100 булаг, 1000 малчин 15000 бөхөн" шинэ төслийг малчид, сум орон нутаг, мэргэжлийн байгууллагууд, төсөл хөтөлбөр газрууд хамтран илүү үр дүнтэйгээр үргэлжлүүлэн зохион байгуулах талаар уулзалт хэлэлцүүлэг амжилттай зохион байгуулагдаж байна.

Тус арга хэмжээг Хүйсийн говь-Цэцэг нуурын сав газрын захиргаа, ДБХС хамтран Говь-Алтай аймгийн Төгрөг сумд зохион байгуулж байгаа бөгөөд БОАЖГ, сумдын ИТХ-ын дарга, Засаг дарга, БОХУБ, эко клубын багш, малчдын төлөөлөл 42 хүн оролцож байна.