Сэлбэ голыг сэргээх, бохирдлыг бууруулахад БНСУ-ын Байгаль орчны яамтай хамтран ажиллана

БОАЖ-ын сайд Б.Бат-Эрдэнийн албан томилолт үргэлжилж байна. Энэ удаад тэрбээр БНСУ-ын Байгаль орчны Сайд Хан Хуа Жин уулзаж, усны салбарт хамтран ажиллах, тэр дундаа Сэлбэ голыг сэргээх, бохирдлыг бууруулах төсөлд дэмжлэг үзүүлж ажиллахаа илэрхийлжээ.

2022 оны 5 дугаар сард БОАЖ-ын сайд Б.Бат-Эрдэнэ БНСУ-д ажлын айлчлал хийх үеэр тус улсын Байгаль орчны сайдтай уулзалт хийж, уур амьсгалын өөрчлөлтийн чиглэлээр хамтын ажиллагааг өргөжүүлж, Парисын хэлэлцээрийн 6 дугаар зүйлд заасан хамтарсан арга хэмжээг хэрэгжүүлэхээр харилцан ойлголцлын санамж бичигт гарын үсэг зурсан. Энэхүү үйл явдал нь талуудын Парисын хэлэлцээрийн хүрээнд хүлээсэн үүрэг амлалтыг биелүүлэхэд чухал ач холбогдолтой юм.

Мөн энэ удаагийн уулзалтаар Монгол Улсын Байгаль орчин, аялал жуулчлалын яам болон БНСУ-ын Байгаль орчны яам хоорондын Бодлогын зөвлөлдөх 2 дугаар уулзалтыг 2023 оны 1 дүгээр улиралд багтаан зохион байгуулж, хамтын ажиллагааны асуудлуудыг илүү бодитой, дэлгэрэнгүй хэлэлцэхээр харилцан тохиролцов.

Монгол Улс 2030 он гэхэд нийт газар нутгийн 30 хувийг тусгай хамгаалалтад авах зорилт тавин ажиллаж байгаа билээ. Энэ зорилтын хүрээнд амжилттай хэрэгжиж буй БНСУ-ын Сорагсаны тусгай хамгаалалттай газар, Монгол Улсын Хан Хэнтийн дархан цаазтай газрын эгч, дүү паркын харилцааг шинэ шатанд гаргах зорилгоор судалгаа, эрдэм шинжилгээний төв байгуулах, түүний сайн туршлагыг үргэлжлүүлэн хоёр орны бусад парк, дархан цаазат газруудыг холбон хамтран ажиллахаар болсон байна.

Түүнчлэн усны салбарт хамтран ажиллах, тэр дундаа Сэлбэ голыг сэргээх, бохирдлыг бууруулахаар хамтран ажиллахаж, дэмжлэг үзүүлэхээ БНСУ-ын Байгаль орчны Сайд Хан Хуа Жин уулзалтын үеэр илэрхийлжээ.

Түүнээс гадна усны бохирдлыг бууруулах, ус хэрэглээний үр ашгийг нэмэгдүүлэхэд чиглэгдсэн усны хэмнэлттэй техник, технологи нэвтрүүлэх, хот суурин газар, аялал жуулчлалын бүс нутгийн хаягдал ус цэвэрлэх байгууламжуудыг шинэчлэх, шинээр байгуулах чиглэлээр хамтран ажиллах, усны шинжилгээний лабораторын хүчин чадлыг нэмэгдүүлэх, боловсон хүчний чадавхыг бэхжүүлэх боломжийн талаар ярилцав.

Монгол Улс болон БНСУ байгаль орчны салбарт өнгөрсөн хугацаанд амжилттай хамтран ажиллаж ирсэн. Монгол Улсын “Алсын хараа-2050”, “Шинэ сэргэлтийн бодлого”-ыг БНСУ-ын “Шинэ Умардын бодлого”-той уялдуулан БНСУ-ын хөрөнгө оруулалтыг татахуйц эдийн засгийн бүтээн байгуулалтын томоохон төсөл, хөтөлбөрийг хэрэгжүүлэхэд Монголын тал онцгой ач холбогдол өгч байгааг БОАЖ-ын сайд Б.Бат-Эрдэнэ уулзалтын төгсгөлд онцлон тэмдэглэв.