Азийн ДНБ энэ онд 4.5 хувиар өснө гэж таамаглаж байна

"Азийн Давос" гэж нэрлэгддэг Боаогийн Азийн форум Хятадын Хайнань мужийн Боао хотод нээлтээ хийсэн талаар бид мэдээлсэн билээ.

Форумын үеэр 2023 онд Азийн Дотоодын нийт бүтээгдэхүүний /ДНБ/ бодит өсөлт өнгөрсөн оны 4.2 хувьтай харьцуулахад 4.5 хувь байх төлөвтэй байгаа талаар Азийн төлөөх Боаогийн эдийн засгийн чуулганы үеэр танилцуулсан тайланд дурджээ.

"Ази дахь эдийн засгийн хэтийн төлөв ба интеграцын үйл явц" нэртэй уг тайланд дурдсанаар, дэлхийн эдийн засгийн гол хөдөлгүүр болох Азийн эдийн засаг 2023 онд эдийн засгийн ерөнхий сэргэлтийг хурдасгаж байгаа нь тус тивийг дэлхийн эдийн засгийн хямралын үед голлох тоглогчдын нэг болгож байна.

Энэ жил Хятад, Энэтхэг улс дэлхийн эдийн засгийн өсөлтийн тал хувийг хангана гэж тайланд Олон улсын валютын сангийн тоо баримтаас эш татан дурджээ.

2023 онд дэлхийн хөдөлмөрийн зах зээлийн байдал муудсан хэдий ч Азийн, тэр дундаа Зүүн Азийн хөдөлмөр эрхлэлтийн үзүүлэлт таамаглаж байснаас илүү сайн байх төлөвтэй байна гэж тайланд онцолжээ.

Чуулган энэ сарын 31-нд өндөрлөнө.