Түгжрэлийг бууруулах үндэсний хороо гурав дахь удаа хуралдлаа
![](https://niitlel.mn/wp-content/uploads/2023/04/76n7xp_3M1G0108-1170x500_x974-1140x500.jpg)
Өчигдөр /2023.04.18/ Нийслэл Улаанбаатар хотын авто замын түгжрэлийг бууруулах Үндэсний хорооны III хуралдаан Хангарьд ордонд боллоо.Тус хуралдааныг Монгол Улсын сайд, Нийслэл Улаанбаатар хотын авто замын түгжрэлийг бууруулах Үндэсний хорооны дарга Ж.Сүхбаатар даргаллаа. Хуралдаанаар Нийслэл Улаанбаатар хотын авто замын түгжрэлийг бууруулах богино болон дунд хугацааны бодлогын судалгааг Нийслэлийн бодлогын судалгаа шинжилгээний төвийн захирал Р.Дагва танилцуулав.
![зураг](https://content.ikon.mn/news/2023/4/19/sw1bfa_M1G48618-1024x674_x974.jpg)
Нийслэл Улаанбаатар хотыг 2040 он хүртэл хөгжүүлэх “Хөгжлийн ерөнхий төлөвлөгөө”, Нийслэлийн нийтийн тээврийн шинэчлэл, явц байдал, тулгарч буй асуудал, шийдэл, Улаанбаатар хот доторх унадаг дугуй, явган зорчигчийн замыг шинээр барьж, нэмэгдүүлэх тухай, Мопед, мотоцикл, унадаг дугуй, цахилгаан дугуй, скүүтэр хэрэглэгчдийн авто замын түгжрэлд нөлөөлөх нөлөөлөл, тэдний аюулгүй байдал, Туулын авто замаас Нүхтийн авто зам хүртэлх замын ажлын явц зэрэг сэдвээр албаныхан мэдээлэл өгч дараах тогтоол, тэмдэглэлүүд гарлаа.
![зураг](https://content.ikon.mn/news/2023/4/19/bu53ex_DSC05305-1024x683_x974.jpg)
“НИЙСЛЭЛ УЛААНБААТАР ХОТЫН 2040 ОН ХҮРТЭЛХ ХӨГЖЛИЙН ЕРӨНХИЙ ТӨЛӨВЛӨГӨӨ”-НИЙ ТӨСЛИЙГ 2023 ОНЫ 05 ДУГААР САРД БАГТААН ЗАСГИЙН ГАЗРЫН ХУРАЛДААНААР ХЭЛЭЛЦҮҮЛЭХИЙГ ДЭМЖЛЭЭ
Өнөөдрийн байдлаар Монгол Улсад хүчин төгөлдөр мөрдөгдөж байгаа 800 гаруй хууль, журам байгаагийн дотор түгжрэл, түүний сөрөг нөлөөллийг бууруулахын тулд хууль эрх зүйн орчныг бүрдүүлэх нь чухал. Энэ хүрээнд Улаанбаатар хотыг орчин үеийн, шинэ дэвшилтэд хот болгон хөгжүүлэхэд бодлогын төлөвлөгөө зайлшгүй юм.
![зураг](https://content.ikon.mn/news/2023/4/19/aj4o5g_DSC05252-1024x683_x974.jpg)
Тиймээс Монгол Улсын урт хугацааны хөгжлийн бодлого Алсын хараа 2050-д тусгасан хөгжлийн олон талт зорилго, зорилтуудыг Улаанбаатар хотын нийтийн тээвэр, авто замын төлөвлөгөөтэй уялдуулж, Улаанбаатар хотын 2040 он хүртэлх ХӨГЖЛИЙН ЕРӨНХИЙ ТӨЛӨВЛӨГӨӨ-г боловсруулсан. Шинэ үеийн хотжилтын ерөнхий хөгжлийг төлөвлөсөн энэхүү хот байгуулалтын цогц баримт бичгийг УИХ-аар хэлэлцүүлэн батлуулбал 2040 он хүртэл Улаанбаатар хот орчин үеийн шинэ хот болж хөгжихөд тун ч ойрхон боллоо. Үндэсний хорооны ээлжит III хуралдаанаар “Нийслэл Улаанбаатар хотын 2040 он хүртэлх хөгжлийн ерөнхий төлөвлөгөө”-г батлуулах тогтоол гаргалаа.
![зураг](https://content.ikon.mn/news/2023/4/19/wu0tio_DSC05237-1024x683_x974.jpg)
МОПЕД, МОТОЦИКЛ, УНАДАГ ДУГУЙ, ЦАХИЛГААН ДУГУЙ, СКҮҮТЕР ХЭРЭГЛЭГЧДИЙН АВТО ЗАМЫН ТҮГЖРЭЛД НӨЛӨӨЛӨХ НӨЛӨӨЛӨЛ, АЮУЛГҮЙ БАЙДЛЫН ТАЛААР ХЭЛЭЛЦЛЭЭ
Мопед, мотоцикл, унадаг дугуй, цахилгаан дугуй, скүүтэр хэрэглэгчдийн авто замын түгжрэлд нөлөөлөх нөлөөлөл, шийдвэрлэх асуудлуудын талаар Тээврийн цагдаагийн албаны дэд бөгөөд Замын цагдаагийн газрын дарга С.Баасанжав Үндэсний хорооны гишүүдэд танилцуулав. Цахилгаан скүүтер нь дэлхий дээрх хамгийн хурдацтай хөгжиж буй технологийн нэг бөгөөд тээврийн салбарт нэвтэрч цаг хугацаа, мөнгө хэмнэх, байгальд ээлтэй, сэтгэл ханамж, нийгмийн хөдөлгөөнийг нэмэгдүүлэх олон талын ач холбогдолтой инновацын шинэ бүтээл юм. Шинэ үеийн залуусын сонголт болж хөгжиж байгаа дээрх нэр бүхий тээврийн хэрэгслийг 2022 онд Монгол Улсын хилээр нэвтрүүлсэн байдлыг харвал нийт 1050 ширхэг орж ирж борлуулагджээ. Авто замын түгжрэлийг сааруулахад ихээхэн нөлөө үзүүлэх дээрх тээврийн хэрэгслийг жолоодон авто замын хөдөлгөөнд оролцохдоо аюулгүй байдлыг хангаж ажиллахыг Үндэсний хорооны хуралдаанаар хэлэлцлээ.
![зураг](https://content.ikon.mn/news/2023/4/19/m9r5n4_DSC05176-1024x683_x974.jpg)
Үүнтэй холбогдуулан дор дурдсан арга хэмжээ авч хэрэгжүүлэхийг Үндэсний хорооны дараах гишүүд, холбогдох албан тушаалтанд даалгав. Замын хөдөлгөөний аюулгүй байдлын тухай хууль, Монгол улсын Замын хөдөлгөөний дүрмийн хэрэгжилтийг хангуулах, цахилгаан тээврийн хэрэгсэл холбогдсон зам тээврийн ослыг бууруулах, урьдчилан сэргийлэх, хяналт тавих үйл ажиллагааг сайжруулах чиглэлээр ажил, арга хэмжээ зохион байгуулахыг Цагдаагийн ерөнхий газрын Тээврийн цагдаагийн албаны дарга, цагдаагийн хурандаа Ц.Ариунболдод үүрэг болголоо. Монгол Улсын гаалийн хилээр нэвтрүүлэх цахилгаан тээврийн хэрэгсэлд гаалийн хяналт тавих, гаалийн бүрдүүлэлт, шалгалт хийх үйл ажиллагааг сайжруулах, холбогдох эрх зүйн баримт бичигт нэмэлт, өөрчлөлт оруулахыг Гаалийн ерөнхий газрын дарга Р.Отгонжаргалд үүрэг болголоо.
НИЙСЛЭЛИЙН НИЙТИЙН ТЭЭВРИЙН ПАРК ШИНЭЧЛЭЛИЙН ХҮРЭЭНД 2023 ОНД 737 АВТОБУС НИЙЛҮҮЛНЭ
Нийтийн тээврийн үйлчилгээг хөгжүүлэх чиглэлээр авах зарим арга хэмжээний талаар Нийслэлийн Нийтийн тээврийн газрын дарга С.Жавхлантбаатар Үндэсний хорооны гишүүдэд танилцуулав.Нийслэл хотын тээврийн салбарт орчин үеийн дэвшилтэт техник, технологийг нэвтрүүлэх замаар иргэдээ дээдэлсэн тээврийн системийг бий болгоно. Энэхүү системийн хүрээнд нийтийн тээврийн үйлчилгээг сайжруулахаас гадна авто тээврийн хяналт, такси үйлчилгээ, ачаа тээврийн үйлчилгээ, хүүхдийн автобус, ажилчдын автобус, техникийн хяналтын үзлэгийн төв, авто үйлчилгээг бүхэлд нь сайжруулахыг зорьж байна.Өнөөдрийн байдлаар Улаанбаатар хотод 107 чиглэлд 996 автобус 520 мянга орчим зорчигчдод үйлчилж байна. Зорчилтын тухайд, энгийн том хүн 47.4 хувь, хүүхэд 15 хувь, ахмад настан 19.8 хувь, ХБИ 7.3 хувь, оюутан 7.1 хувь, цагдаагийн албан хаагч 3.35 хувь, хүндэт донор 0.05 хувийг эзэлж байна. Бид 2023 онд авто замын түгжрэлийг бууруулах зорилтын хүрээнд нийтийн тээврийн зорчилтын тоог нэмэгдүүлэхээс гадна автобус үйлчилгээний чиглэлийг 124, автобусны тоог 1597 хүргэхээр зорьж байна.
НИЙТИЙН ТЭЭВРИЙН ПАРК ШИНЭЧЛЭЛ
Нийтийн тээврийн парк шинэчлэлийн тухайд ирэх тавдугаар сараас эхлэн нийтийн тээврийн парк шинэчлэлийг эрчимжүүлэх бөгөөд их багтаамжийн дизель автобус 600, дунд багтаамжийн 50, цахилгаан 160, нийт 810 автобусаар парк шинэчлэлтийг 2023-2024 онуудад хийж дуусгана. Парк шинэчлэлтийн хүрээнд шинээр нийлүүлэгдэх автобусны эхний ээлжийн автобус 5 дугаар сараас эхлэн сар бүр нийлүүлэгдэх бөгөөд энэ ондоо багтан 737 автобусаар насжилт өндөр, одоогийн автобуснуудыг шинэчилнэ. Төр, хувийн хэвшлийн зохистой түншлэлийн зарчмаар нийтийн тээврийн салбарыг дэмжиж хамтран ажиллана.
ТУУЛ ГОЛЫН ДАГУУХ АВТО ЗАМААС НҮХТ ХҮРТЭЛХ ЗАМЫН АЖЛЫН ЯВЦ БАЙДЛЫГ ТАНИЛЦУУЛЛАА
Засгийн газрын 2022 оны 12 дугаар сарын 21-ний өдрийн “Улаанбаатар хотын “Шинэ тойрог зам”-ыг барьж байгуулах тухай 476 дугаар тогтоолыг хэрэгжүүлэхэд авах арга хэмжээний талаар Зам, тээврийн хөгжлийн яамны Авто замын бодлогын хэрэгжилтийг зохицуулах газрын шинжээч Б.Цэрэнсодном Үндэсний хорооны гишүүдэд танилцуулав. Үүнтэй холбогдуулан дор дурдсан арга хэмжээг авч хэрэгжүүлэхийг Үндэсний хорооны гишүүд, холбогдох албан тушаалтанд даалгалаа.
![зураг](https://content.ikon.mn/news/2023/4/19/jzwuqe_DSC05268-1024x683_x974.jpg)
Тухайлбал “Шинэ тойрог зам” төслийн урд хэсэг, Туулын авто зам болон Туулын авто замыг Нисэхийн хурдны авто замтай холбох (Туулын авто замаас Нүхтийн авто зам хүртэл) авто замын төслүүдийн хүрээнд авто замын зурвас газрыг тусгай хэрэгцээнд авах ажлыг холбогдох хууль тогтоомжийн дагуу 2023 оны 02 дугаар улиралд багтаан шуурхай зохион байгуулах тухай Үндэсний хорооны тэмдэглэл гарлаа. Авто замын төслүүдийн техник, эдийн засгийн үндэслэл, барилгын ажлын нарийвчилсан зураг төслийг баталгаажуулахад шаардлагатай техникийн нөхцөлийг шуурхай 2023 оны 6,7 дугаар сард багтаан олгож ажиллахаар боллоо. “Шинэ тойрог зам” төслийн урд хэсэг, Туулын авто замыг “Төрийн өмчийн концессын жагсаалтад тусгуулах (Барих-Ашиглах-Шилжүүлэх)” ажлыг зохион байгуулж ажиллах Үндэсний хорооны тэмдэглэл гарлаа.
УЛААНБААТАР ХОТ ДОТОРХ УНАДАГ ДУГУЙ, ЯВГАН ЗОРЧИГЧИЙН ЗАМЫГ ШИНЭЭР БАРЬЖ, НЭМЭГДҮҮЛЭХ ТУХАЙ
Улаанбаатар хот доторх унадаг дугуй, явган зорчигчийн замыг шинээр барьж, нэмэгдүүлэх төлөвлөлтийг Улаанбаатар хотын Захирагчийн ажлын албаны дугуйн ба явган хүний зам, тохижилтын хэлтсийн дарга Г.Билгүүн танилцууллаа. 2023 онд төдийгүй цаашид унадаг дугуйн зам, гүүрэн байгууламжийн дэд бүтцээ нэмэгдүүлэхээр ажиллаж байгаа бөгөөд 2023 онд дугуйн зам барихад 27.5 тэрбум, гүүрэн байгууламж барихад 52.2 тэрбум төгрөгийн хөрөнгө оруулалт шаардлагатай байна.
![зураг](https://content.ikon.mn/news/2023/4/19/ammwdu_DSC05295-1-1024x683_x974.jpg)
Өнөөдрийн байдлаар зураг төсөл нь боловсруулагдаж байгаа дугуйн замын тухайд, 17 байршилд 24.5 км зам барих, 8 байршилд 3.1 км гүүрэн байгууламж нийт 27.6 км зам, гүүрэн байгууламжийн зураг төслийг боловсруулсан байна. Энэ онд 4 байршилд 3.18 км дугуйн зам, 3 байршилд 1.67 км гүүрэн байгууламжийг шинээр барина. Ингэснээр түгжрэл 3 хувиар буурах тооцооллыг мэргэжлийнхэн гаргажээ.
Эх сурвалж: Нийслэл Улаанбаатар хотын авто замын түгжрэлийг бууруулах Үндэсний хороо
Сэтгэгдэл үлдээх