3х3 сагсан бөмбөгийн шигшээ багийн тамирчид энэ сарын 12-14-нд олимпын эрх авах эхний тэмцээндээ оролцоно

Сингапур Улсад зохион байгуулагдсан FIBA 3х3 сагсан бөмбөгийн 2024 оны Ази Тивийн Аварга Шалгаруулах Тэмцээн(ААШТ)-д Монгол Улсын үндэсний шигшээ эрэгтэй, эмэгтэй баг хос хүрэл медаль хүртсэн.

Өндөр амжилт үзүүлсэн тэднийг багш, дасгалжуулагчдынх нь хамт өнөөдөр Ерөнхийлөгч У.Хүрэлсүх хүлээн авч уулзлаа.

Тэрбээр Монгол Улсын баг, тамирчид Ази тивийн аварга шалгаруулах тэмцээнээс хос медаль хүртэж, олон улсын тавцанд Монгол Улсынхаа нэрийг өндөрт өргөсөнд баяр хүргэж, ард түмний нэрийн өмнөөс талархал илэрхийлэв. Мөн Үндэсний шигшээ багийн тамирчид, дасгалжуулагчид эв нэгдэлтэй, хөдөлмөрч, сахилга баттай байж чадвал олон боломж байгааг онцолж, цаашдын тэмцээн, уралдаанд нь амжилт хүслээ.

Монголын сагсан бөмбөгийн холбооны ерөнхийлөгч Г.Батцэнгэл Монгол Улсын шигшээ баг 3х3 сагсан бөмбөгийн төрлөөр Ази тивдээ жишиг тогтоож, хүлээн зөвшөөрөгдөж чадсаныг онцлов. Үндэсний шигшээ багийн тамирчид дөрөвдүгээр сарын 12-14-ний өдрүүдэд олимпын эрх авах эхний тэмцээндээ оролцохоор Хонконгийг зорино гэдгийг дуулгалаа.

Түүнчлэн Монголын сагсан бөмбөгийн холбооноос 2024 онд 3х3 сагсан бөмбөгийн Залуучуудын дэлхийн аварга шалгаруулах тэмцээн, 2025 онд 3х3 сагсан бөмбөгийн Насанд хүрэгчдийн дэлхийн аварга шалгаруулах тэмцээнийг тус тус эх орондоо зохион байгуулахаар төлөвлөн ажиллаж байгааг танилцуулав.

Эх сурвалж: Ерөнхийлөгчийн Тамгын Газар