ШУВУУ АЖИЛЛАГАА: Хүний амь нас хөнөөх захиалга өгсөн этгээдийг Австрали улсаас албадан авч ирж байна

Хүний амь нас хөнөөх захиалга өгсөн этгээдийг Австрали улсаас албадан авч ирж байна.

Тодруулбал, 2015 онд Монгол Улсын иргэн “А”-г бусдын захиалгаар хутгалж, амь насыг нь хөнөөсөн гэмт хэргийг үйлдсэн этгээд нь ОХУ-аар дамжин БНХАУ-руу оргон зайлсныг Интерполын шугамаар эрэн сурвалжлан олж тогтоожээ. Түүнийг 2017 онд БНХАУ-аас шилжүүлэн авч холбогдох хэргийг шалгахад “А” нь “Б” гэгчийн захиалгаар уг хүн амины гэмт хэргийг үйлдсэн болох нь тогтоогдсон байна. Тэгвэл дээрх хүнийг алах гэмт хэргийг үйлдэх захиалгыг өгсөн “Б” нь тухайн үед мөн гадаад улсад оргон зайлсан байсныг Интерполын шугамаар олон улсын хэмжээнд эрэн сурвалжилан “Шувуу” ажиллагааны хүрээнд Австрали Улсад байгааг нь тогтоожээ.

Улмаар тус улсын эрх бүхий байгууллагуудтай хамтран ажилласны дүнд 2024 оны дөрөвдүгээр сарын 30-ны өдөр Монгол Улсад албадан авчрах ажиллагааг явуулж байна. Түүнийг Монгол улсад авчрах ажиллагааг Хууль зүй, дотоод хэргийн яам болон Цагдаагийн Ерөнхий Газраас Австралийн Холбооны Улсын Хууль сахиулах байгууллагууд, тус улсын Интерполын Үндэсний төв товчоотой хамтран амжилттай зохион байгуулжээ.

Эх сурвалжийн мэдээлснээр түүнийг өнөөдөр 18 цагт авч ирэх аж.