Автомашин онхолдож, 10-14 настай хоёр хүүхэд амиа алджээ

Хэнтий аймгийн Цэнхэрмандал сумын Согоот 3 дугаар багийн “Устын-Ам” гэдэг газар суудлын автомашин замын хажуу руу онхолдож, автомашины бүхээгт гурван хүн хавчуулагдаж нас баржээ. Хоёр нь хүүхэд аж. Энэ тухай дуудлагыг наймдугаар сарын 27-ны өдрийн 06:20 цагт холбогдох албаныхан хүлээж авсан байна.

Нийслэлийн Багануур дүүргийн Онцгой байдлын хэлтсийн Гал түймэр унтраах, аврах 64 дүгээр ангийн алба хаагчдыг очиход Хэнтий аймгаас нийслэлийн Багануур дүүргийн чиглэлд зорчиж явсан “Тоёота хайлукс” загварын суудлын автомашин автозамын хажуу тал руу онхолдож, автомашины бүхээг дотор иргэн Ө /38 настай эрэгтэй/, С /8 настай эмэгтэй/ нар хавчуулагдсан байсныг эсэн мэнд гарган тус дүүргийн Эрүүл мэндийн төвд хүргүүлжээ. Харин иргэн О /38 настай эмэгтэй/, Д /14 настай эрэгтэй/, Н /10 настай, эмэгтэй/ нар хавчуулагдаж нас барсан байсан тул цогцсыг гаргаж, Цэнхэрмандал сум дахь Цагдаагийн хэсгийн мөрдөгчид шилжүүлэн өгсөн байна.