Гурван гишүүний бүрэн эрхийг түдгэлзүүлэх эсэхийг энэ долоо хоногт хэлэлцэнэ

АТГ нүүрсний гэх хэрэгт холбогдуулан УИХ-ын гишүүн Т.Аюурсайхан, Д.Бат-Эрдэнэ, Н.Наранбаатар нарыг яллагдагчаар татсан. Улмаар бүрэн эрхийг нь түдгэлзүүлэх саналаа ерөнхий прокурорт хүргүүлсэн юм. Ерөнхий прокурор Б.Жаргалсайхан тэднийг яллагдагчаар татах саналаа өнгөрсөн баасан гаригт УИХ-ын даргад ирүүлжээ. Энэ талаар УИХ дахь МАН-ын бүлгийн дарга Д.Тогтохсүрэн хэлэхдээ "УИХ-ын даргын нэр дээр гурван гишүүний бүрэн түдгэлзүүлэн шалгах саналаа ирүүлсэн байна лээ. Хуулийн хугацаанд буюу энэ долоо хоногтоо багтааж шийдвэрлэх ёстой. МАН-ын бүлэг өнөөдрийн хуралдаанаараа энэ асуудлыг хэлэлцээгүй. Лхагва, пүрэв гаригийн аль нэгэнд хуралдаж хэлэлцэнэ. Эхлээд УИХ-ын халдашгүй байдлын дэд хороо хуралдаж хэлэлцэнэ. Хэрэг бүртгэл, мөрдөн байцаалтын үйл ажиллагаа, хэрэгтэй танилцах эрх зөвхөн энэ дэд хорооны гишүүдэд бий. Тиймээс Халдашгүй байдлын дэд хороо хуралдсаны дараа бүлэг хуралдаж шийдлээ гаргана" гэлээ.