“Цэвэр агаар – Эрүүл инээмсэглэл 2026” 1000 хүүхдийн цасны баяр амжилттай зохион байгуулагдлаа

Монголын улаан загалмай нийгэмлэгийн Хүүхэд, залуучуудын хөдөлгөөн “Скай Резорт” цанын баазтай хамтран “Цэвэр агаар – Эрүүл инээмсэглэл 2026” 1000 хүүхдийн цасны баярыг 2026 оны гуравдугаар сарын 02–05-ны өдрүүдэд 4 ээлжээр зохион байгуулагдав.

Улаанбаатар хотын агаарын бохирдол, ялангуяа PM2.5 тоосонцрын жилийн дундаж агууламж ДЭМБ-ын зөвлөмж хэмжээнээс хэд дахин өндөр байгаа нөхцөлд энэхүү арга хэмжээ зохион байгуулж байна. Энэхүү арга хэмжээ нь зорилтот бүлгийн хүүхэд багачуудыг нэг өдрийг цэвэр агаарт үнэ төлбөргүй өнгөрүүлэх, бие бялдрыг чийрэгжүүлэх, өвлийн спортоор хичээллэх боломжийг бүрдүүлж байгаагаараа онцлог юм.

Хамрагдсан хүрээ:

• Нийслэлийн 9 дүүргийн ерөнхий боловсролын сургуулийн сурагчид
• Асрамж, халамжийн төвийн хүүхэд багачууд
• Зорилтот бүлгийн болон тусгай хэрэгцээт 12–17 насны нийт 1000 хүүхэд

Арга хэмжээний хүрээнд:

• Цана болон чарга хэмээн өвлийн спортоор аюулгүй орчинд тоглох
• Бие бялдрын хөгжил, багаар ажиллах чадварыг дэмжих
• Нийгэмшүүлэх, эрүүл амьдралын хэв маягийг төлөвшүүлэх
• Хүүхдүүдэд халуун цай, аюулгүй ажиллагааны зааварчилгаа, хамгаалалт

Энэхүү үйл ажиллагаа нь 2017 оноос хойш уламжлал болгон зохион байгуулагдаж буй бөгөөд бизнесийн байгууллагууд болон хувь хүмүүсийн нийгмийн хариуцлагын оролцоог нэмэгдүүлж, хүмүүнлэгийн үйл ажиллагааг олон нийтэд сурталчлан таниулж байгаагаараа ач холбогдолтой юм.