Төрийн алба хаагчдын цалинг нэмэхийн тулд эдийн засгаа тэлнэ эсвэл орон тоогоо хасна

Монгол Улсын Ерөнхий сайд Л.Оюун-Эрдэнэ Өмнөговь аймгийн Даланзадгад хотод Засгийн газрын зарим гишүүний хамт ажиллаж байна. Тэрбээр тус аймгийн залуучуудын төлөөлөлтэй уулзаж, Засгийн газрын Шинэ сэргэлтийн бодлогыг танилцуулж, тэдний санал хүсэлтийг сонсож ярилцлаа.

Залуучуудын уулзалт дээр Ерөнхий сайд хөгжлийн хязгаарлагч зургаан хүчин зүйлсийг шийдэхийн тулд "Алсын хараа 2050" хөгжлийн бодлогын эхний 10 жил буюу 2030 он хүртэлх хугацаанд Засгийн газраас Шинэ сэргэлтийн бодлогын хүрээнд хэрэгжүүлэх төсөл, хөтөлбөрүүдийг танилцуулав. Мөн тус аймгийн хөгжилд уул уурхайн экспортыг нэмэгдүүлэх авто болон төмөр замын хилийн боомтууд, хил холболтын  цэгүүд, уул уурхай, аж үйлдвэрийн цогцолборуудыг цогцоор нь хөгжүүлэхийн ач холбогдол, үүнд Өмнөговь аймгийн залуучууд хэрхэн оролцож үр шимийг нь хүртэх боломжтой талаар ярилаа. Мөн энэ эгзэгтэй цаг үед улстөржилт хэрэггүй, харин ч том зорилгын төлөө нэгдэж нийлж ажиллах нь илүү үр дүнтэй гэлээ.

Мөн тэрбээр "Төрийн алба хаагчдын цалинг ирэх жилээс эхлэн үе шаттайгаар нэмнэ. Ингэхдээ эдийн засгаа тэлнэ эсвэл орон тоогоо хасна. Маш олон хүн халагдаж байгаа учраас тэдний ар гэрт асуудал үүснэ. Тэдний хувьд бид тийм ч таатай улсууд биш. Гэхдээ нийгэмдээ оруулж буй хувь нэмрийн хувьд хэзээ нэгэн цагт хэн нэгний хийх л байсан шинэчлэлт. Энэ шинэчлэлтийг хийхийн тулд хамтдаа ил тод ярилцаж шийддэг байх ёстой" гэв.

Оюутолгой,  Тавантолгой, уул уурхайн бусад ордууд, аж үйлдвэрийн цогцолборуудыг түшиглэж ойрын жилүүдэд Өмнөговь аймгийг улсын чанартай гурван хотын нэг болгож хөгжүүлэх томоохон зорилтыг Засгийн газар бодит ажил болгохоор ажиллаж буйг онцлов. Цар тахал, ОХУ, Украины асуудлаас үүдэлтэй дэлхийн эдийн засгийн хүнд сорилтыг Монгол Улс эрсдэл багатай давж гарахын тулд төр, хувийн хэвшил хамтарч уул уурхайн бүтээгдэхүүний экспортоо нэмэгдүүлэх шаардлагатай байна. Уул уурхай, ашигт малтмалын ордуудыг эдийн засгийн эргэлтэд оруулахад тулгамдаж буй нэг асуудал нь мэргэжилтэй боловсон хүчний дутагдал учраас Өмнөговь аймагт инженерүүдийг бэлтгэхээр Засгийн газар шийдвэрээ гаргасан гэлээ.

Өмнөговь аймагт тулгамдаж байгаа усны асуудал, цалин хөлсний нэмэгдэл, бараа бүтээгдэхүүний үнийн өсөлт, ачаа бараа нийлүүлэлт тасалддаг хүндрэл, боловсролын индексийг дэлхийн жишигт хэрхэн хүргэх зэрэг цаг үеийн бусад асуудлаар залуучуудтай илэн далангүй ярилцаж, сонирхсон асуултад нь Засгийн  газрын холбогдох сайд нар хариуллаа.