Байгаль орчин, аялал жуулчлалын дэд сайд Г.Пүвдэндорж АНУ-аас Монгол улсад суугаа элчин сайдын яамны төлөөлөгчдийг хүлээн авч уулзан санал солилцов

Уулзалтын эхэнд талууд энэ оны 12 дугаар сард Канад Улсад болох Биологийн олон янз байдлын тухай конвенцын талуудын бага хурлын талаар мэдээлэл солилцоод, “The Nature Conservancy” /TNC/ байгууллагатай хамтран хэрэгжүүлэхээр зорьж буй биологийн олон янз байдлын урт хугацааны санхүүжилтийн боломжуудын талаар санал солилцлоо. Манай хоёр орны хувьд уур амьсгалын өөрчлөлт, тусгай хамгаалалттай нутгийн менежмент, амьтан ургамал болон аялал жуулчлалын чиглэлээр хөгжүүлж буй хамтын ажиллагаа цаашид улам бүр өргөжин тэлнэ гэдэг итгэлттэй байгаагаа талууд уулзалтын үеэр онцлон тэмдэглэв.

БОАЖ-ын дэд сайд Г.Түвдэндорж хэлэхдээ, 12 дугаар сард Канад Улсын Монреал хотноо болох Биологийн олон янз байдлын тухай НҮБ-ын суурь конвенцын талуудын 15 дугаар бага хурлын Сайд нарын түвшний хуралд БОАЖ-ын сайд Б.Бат-Эрдэнэ тэргүүтэй төлөөлөгчид оролцохоор бэлтгэл ажлыг хангаж байгааг дурдаад, тус улсын төлөөлөгчдийн тэргүүнтэй уулзах боломжийг элчин сайдын яамаараа дамжуулан уламжлуулаад байна. Цаашид байгаль орчин, аялал жуулчлалын салбарт түншлэгч талуудтай хамтран хэрэгжүүлж буй төслүүдийн уялдааг хангах чиглэлийг хариуцан ажилладаг тул хоёр орны хамтын ажиллагааны бодит хэрэгжилтийг хангахад хувь нэмрээ оруулна гэж найдаж байгааг тэрбээр онцолсон юм.

Түүнээс гадна АНУ-ын Вашингтон хотноо төвтэй “The Nature Conservancy” TNC байгууллага болон Монгол дах хөтөлбөрийн газартай хамтран биологийн олон янз байдлын урт хугацааны санхүүжилтийн механизмыг бэхжүүлэх ажил эхэлсэн. Сангийн яам болон бусад холбогдох газруудтай хамтран санал солилцож байна гэж тэрбээр ярьсан юм.