“Агаар орчны бохирдлыг бууруулах технологи-2022” үзэсгэлэн болно

Байгаль орчин, аялал жуулчлалын яам байгаль орчныг хамгаалах, нөөцийг зохистой ашиглах, орчны доройтлыг бууруулахад техник, технологийн ололт, инновацын шийдлийг ашиглах, ногоон технологийг иргэд, олон нийтэд сурталчлан таниулж, амьдралын зүй зохистой хэрэглээ, үйлдвэрлэлийн дадал, хандлага бий болгох зорилгоор “Агаар, орчны бохирдлыг бууруулах ногоон технологи-2022” үзэсгэлэнг Орчны бохирдлыг бууруулах Үндэсний хороо, Нийслэлийн агаар, орчны бохирдолтой тэмцэх газартай хамтран зохион байгуулна.

Байгаль орчинд ээлтэй ногоон технологийн үзэсгэлэнг 2013 оноос хойш 9 дэх жилдээ зохион байгуулагдах гэж байна. Үзэсгэлэнд аж ахуйн нэгж, байгууллагууд байгальд ээлтэй, нөөцийн хэмнэлттэй, дэвшилтэт техник, технологи инновацын шийдлээ танилцуулах юм.

Тухайлбал,

Агаар, орчны бохирдлыг бууруулах, эрчим хүчний хэмнэлттэй халаагуур, дулаалга, агаар цэвэршүүлэгч, авто тээврийн хэрэгслээс ялгарах бохирдуулагч бодисын хэмжээг бууруулах технологи, эко ариун цэврийн байгууламж, хог хаягдал дахин боловсруулах, бохир ус цэвэрлэх зэрэг тоног төхөөрөмж, бараа бүтээгдэхүүнээ танилцуулна.

Мөн БОАЖЯ, Орчны бохирдлыг бууруулах Үндэсний хороо 2019 оноос Хаан, Хас, Төрийн банктай хамтран хэрэгжүүлж буй хөнгөлөлттэй нөхцөл бүхий “Ногоон зээл”-ийн үйлчилгээний талаар мэдээлэл хүргэнэ.

Түүнээс гадна “НОГООН ЗЭЭЛ”-ийг Агаар, орчны бохирдлыг бууруулах, байгальд ээлтэй, бүтээмжтэй тогтвортой хэрэглээ, үйлдвэрлэлийг дэмжих зорилгоор иргэнд жилийн 2-3 хувийн хүүтэй, аж ахуйн нэгж, байгууллагад 8 хувийн хүүтэйгээр олгож буй зээлийн талаарх мэдээллийг авах боломжтой.

Үзэсгэлэн 10 дугаар сарын 8,9-ны өдөр Дүнжингарав худалдааны төвийн “Нэг цэгт” зохион байгуулахаар бэлтгэл ажлыг хангаж байна.