Агаарын бохирдолтой тэмцэх Ази, номхон далайн түншлэлийн өндөр хэмжээний уулзалтыг 2023 онд Монгол Улсад зохион байгуулах асуудлаар санал солилцов

БОАЖ-ын сайд Б.Бат-Эрдэнийн албан уулзалт НҮБ-ын нийгэм, эдийн засгийн хорооны хүрээлэн буй орчин, хөгжлийн газрын захирал Сангмин Намтай хийсэн уулзалтаар үргэлжилж байна.

Уулзалтын эхэнд НҮБ-ын нийгэм, эдийн засгийн хорооны хүрээлэн буй орчин, хөгжлийн газрын захирал Сангмин Нам хэлэхдээ, Монгол Улсын БОАЖ-ын сайдын санаачилгаар бүс нутгийн хэмжээнд агаарын бохирдлыг бууруулах бодлогын механизм, платформыг бий болгох талаар хүчин чармайлт гарган ажиллаж буйг дэмжиж байгаагаа илэрхийлээд, улс орнуудын хамтран боловсруулсан тунхаг бичгийн хүрээнд манлайлан ажиллана гэдгээ онцлон тэмдэглэв.

Дээрх хорооны хуралдааны дүнд Сайд нарын Тунхаглал болон тус Тунхаглалын хавсралтыг батлах бөгөөд манай улс Тунхаглалын хавсралтыг боловсруулахад анхнаас нь идэвхтэй оролцож, Агаарын бохирдолтой тэмцэх Ази, Номхон далайн түншлэлийн механизм бий болгох саналыг тууштай дэвшүүлж ажилласан ирсэн юм. Тус баримт бичигт түншлэлийн тухай заалт оруулснаар, Агаарын бохирдолтой тэмцэх Ази, Номхон далайн түншлэлийн Өндөр хэмжээний уулзалтыг 2023 онд Монгол Улс зохион байгуулах боломж бүрдэх юм.

АНДЭЗК -ын Байгаль орчин, хөгжлийн хорооны чиг үүрэгт эдийн засаг, нийгмийн хөгжлийн хүрээнд байгаль орчны тогтвортой байдлыг нэмэгдүүлэх, тэр дундаа уур амьсгалын өөрчлөлтийг сааруулах, дасан зохицох бодлого, стратегийг боловсруулах, байгалийн нөөцийн тогтвортой менежментийг хэрэгжүүлэх, хүртээмжтэй, тогтвортой хөгжлийг бий болгох зэрэг асуудал багтаж байна.

Тус хорооны энэ удаагийн хуралдаан нь Сайд нарын төвшинд “Ази, Номхон далайн бүс нутагт хамтын ажиллагаа, эв нэгдлийг хангах замаар эх дэлхийгээ хамгаалах нь” (Protecting our Planet through regional cooperation and solidarity in Asia and the Pacific) сэдвээр зохион байгуулагдах ба уур амьсгалын өөрчлөлт, биологийн олон янз байдлын хамгаалал, агаарын бохирдлыг бууруулах зэрэг асуудлаар илтгэл танилцуулагдаж, хэлэлцүүлэг өрнүүлж байна.

Энэхүү хуралдаан нь хоёр жил тутамд болдог ба бүс нутгийн байгаль орчин, хөгжлийн чиг хандлагыг дүгнэх, үйл ажиллагааны тэргүүлэх чиглэлийг тодорхойлох, яриа хэлэлцээг дэмжих, бүс нутгийн хөгжлийн сорилтыг шийдвэрлэхэд гишүүн улс орнуудын засгийн газар, иргэний нийгэм, хувийн хэвшил, НҮБ-ын салбар агентлагийн хамтын ажиллагааг дэмжих зорилготой.

НҮБ-ын Ази, Номхон далайн эдийн засгийн комиссын (АНДЭЗК) Сайд нарын түвшний 7-р хуралдаанд Монгол Улсын Байгаль орчин, аялал жуулчлалын яам албан ёсоор оролцох боллоо.