Шүүхээс дагавар охиноо хүчиндсэн гадаадын иргэнд 14 жил ял оногдуулжээ

Шийдвэрийн дугаар: 2022.10.13 №1481 ШТ

Шийдвэрийн төлөв: Хуулийн хүчин төгөлдөр болсон

Шийдвэр хураангуй-9

Гадаад улсын иргэн Т нь олон удаагийн үйлдлээр өөрийн дагавар хүүхэд болох 11 настай охиныг хүчиндсэн гэмт хэрэгт холбогдуулан прокуророос яллах дүгнэлт үйлдэж хэргийг шүүхэд шилжүүлжээ.

Хэрэгт авагдсан баримтуудаар, шүүгдэгч Т нь анх 2012 онд “хөдөлмөр эрхлэгч” ангиллаар, 2019 оныг хүртэл Монгол Улсад оршин суух зөвшөөрөлтэйгээр орж ирсэн, 2019 оноос хойш оршин суух зөвшөөрөлгүй буюу Монгол Улсын нутаг дэвсгэрт хууль бусаар оршин суусан, энэ хугацаанд Монгол Улсын иргэн Д-тэй хамтран амьдарч, дундаасаа 2 хүүхэдтэй болсон, мөн авто засварын газар ажиллуулдаг байжээ.

Түүнчлэн, Т нь “өрх гэрийн амьжиргааг авч явдаг” гэдгээр шалтаглан өөрийн дагавар охин болох бага насны хүүхдийг хүчээр бэлгийн харьцаанд орохыг тулгаж, хохирогчтой бэлгийн харьцаанд ордог байсан ба шүүхийн хэлэлцүүлэгт тэрээр гэм буруугаа хүлээн зөвшөөрч байна гэж мэдүүлсэн байна.

Эрүүгийн хуульд бага насны буюу 14 хүртэлх насны хүүхэдтэй бэлгийн харьцаанд орсон бол 12-20 жил хүртэл хугацаагаар, эсхүл бүх насаар хорих ял шийтгэхээр заасан.

Шүүхээс гадаад улсын иргэн Т-г үргэлжилсэн үйлдлээр хүчиндэх гэмт хэргийг бага насны хүүхдийн эсрэг үйлдсэн гэм буруутайд тооцож, 14 жилийн хугацаагаар хорих ял шийтгэж, уг ялыг хаалттай хорих байгууллагад эдлүүлэхээр шийдвэрлэв.

Түүнчлэн, энэ гэмт хэргийн хохирогч нь энэ гэмт хэргийн улмаас сэтгэл санаа, эрүүл мэндийн хувьд хүнд хохирол амсаж, цаашид эмчилгээ хийлгэх шаардлага үүссэн тул хохирогчийн хууль ёсны төлөөлөгчөөс холбогдох зардлаа гэм буруутай этгээдээс жич нэхэмжлэх эрхийг нь нээлттэй үлдээсэн байна.

Санамж:           

Энэ хураангуй нь бүрэн гүйцэд шүүхийн шийдвэр биш бөгөөд түүнийг орлохгүй, зөвхөн шүүхийн шийдвэрийг олон нийтэд ойлгомжтой байдлаар мэдээлэн хүргэх зорилготой болно.

Шийдвэр нь насанд хүрээгүй хүүхдийн эрх, хууль ёсны ашиг сонирхлыг хөндөж байх тул шийдвэрийн цахим санд байршаагүй болно.          

 

Шүүхийн шийдвэрийн хураангуй бичсэн: Баянзүрх дүүргийн Эрүүгийн хэргийн анхан шатны шүүхийн шүүгч С.Олзод.