М.Баяраа: Угсармал орон сууцуудыг дулаалснаар 3, 4 дүгээр хорооллыг дулаан, эрчим хүчээр хангах хэмжээний хэмнэлт хийх боломжтой
![](https://niitlel.mn/wp-content/uploads/2023/07/64c0fff4a1027a4a43feea9f-1140x900.jpg)
Нийслэлийн Засаг даргын зөвлөлийн хурал болж, Нийгмийн салбар, ногоон хөгжил болон агаар, орчны бохирдлын асуудал хариуцсан орлогч З.Төмөртөмөө удирдан явуулав.
Улаанбаатар хотын орон сууцны эрчим хүчний үр ашгийг дээшлүүлэх төслийн талаар Улаанбаатар хотын ерөнхий менежер бөгөөд Захирагчийн ажлын албаны дарга М.Баяраа танилцууллаа.
Хоёр үе шаттайгаар 60 сарын хугацаанд хэрэгжих төсөл нь дулааны техникийн шинэчлэлийн хөтөлбөрийг эхлүүлж, барилгын эрчим хүчийг хэмнэх хөрөнгө оруулалтыг нэмэгдүүлэх зорилготой юм.
Төслийн хүрээнд дулаан техникийн шинэчлэлд хамрагдах барилгад орон сууц өмчлөгчдийн саналыг нэгтгэсэн, газар хөдлөлтийн үнэлгээнд тэнцсэн байх шаардлага тавьж буй. Төслийн багийн зүгээс Баянзүрх, Баянгол, Сонгинохайрхан, Чингэлтэй дүүргийн ЗДТГ болон зарим угсармал орон сууцны СӨХ, оршин суугчидтай уулзсан бөгөөд иргэд орон сууцаа дулаалуулах сонирхолтой байгаагаа илэрхийлжээ. Төсөлд хамрагдах боломжтой байруудын жагсаалтыг наймдугаар сард гаргахаар төлөвлөн ажиллаж байна. Мөн төслийн хүрээнд хийх нэг томоохон ажил нь дулааны тоолуур суурилуулах юм.
Зөвлөлийн гишүүд өндөр ач холбогдолтой, чухал төсөл гэдгийг онцолж байлаа.
Сэтгэгдэл үлдээх